Siglir tar il cuntegn

Header

audio
Festa d'uffants Savognin: In'aventura al lai Barnagn
Or da Sport ed actualitad dals 17.07.2022.
laschar ir. Durada: 3 minutas 45 Secundas.
cuntegn

Savognin Festa d’uffants attira bleras famiglias

Stizzar fieu cun Grisu, ina ruschnera gigantica e raiver sin harassas: la festa d’uffants al Lai Barnagn ed a Tigignas ha ademplì blers giavischs. Cun bellezza aura han bleras famiglias visità cun lur uffants la festa tradiziunala.

La festa d’uffants è mintgamai in dals puncts culminants da l’onn per ils pitschens. Sco quai che Tanja Amacher, la directura da Savognin Turissem ha ditg, saja ella fitg cuntenta ch’ins haja uschè bler cletg cun l’aura. Cun il dumber d’entradas vendidas saja ella cuntenta. Ins s’accorschia il mument però schon ch’i tiria blera glieud puspè a la mar, tut auter che durant ils temps da corona. Il mument saja per exempel nagin problem – malgrà la stagiun auta – da chattar anc in’abitaziun da vacanzas vida. Amacher ha constatà che blera glieud saja vegnida si da la Val dal Rain, tranter auter per scappar da la gronda chalira.

Puspè festa suenter ina pausa sfurzada

Pervi da la pandemia ha la festa d’uffants a Savognin stuì vegnir annullada duas giadas. Ussa ha ella puspè gì lieu en il rom usità. Ella ha gì lieu durant l'entira fin d'emna dals 16 e 17 da fanadur. Nova è stada quest onn la ruschnera gigantica cun ina lunghezza da 100 meters. Glischnà vegn sin in rintg da gumma – la ruschnera finescha direct en il lai Barnagn. La ruschnera è installada anc enfin il prim d’avust al lai Barnagn a Savognin.

RTR actualitad 17:00

Artitgels legids il pli savens