Siglir tar il cuntegn
Inhalt

Grischun Central Savognin: Emprima badigliada dal project Viols l’atun

Tar la votaziun a l’urna dals 10 da schaner ha la vischnanca da Surses dà glisch vera per il hotel e bogn Savognin. Il project turistic è vegnì inoltrà al chantun per in sustegn da promoziun. Tenor ina communicaziun da la vischnanca, para pussaivel da cumenzar cun las lavurs l’atun

Visualisaziun cun vista vers l'hotel e bogn planisà.
Legenda: Visualisaziun cun vista vers l'hotel e bogn planisà. mad

Avant ch’i vegn decidì a moda definitiva, ha il team da project da furnir anc diversas actas. La construcziun dal project turistic a Savognin ha in volumen d’investiziuns da passa 100 milliuns francs. L’entir project cumpiglia in hotel da trais stailas superiour cun circa 125 chombras singulas e dublas cun totalmain circa 250 letgs e diversas ustarias. Il bogn da divertiment cumpiglia divers bogns externs ed interns, in sectur da divertiment ed ina moderna partiziun da wellness. Il ressort da vacanzas Viols sa cumpona da otg chasas che cumpiglian 96 abitaziuns dad aut standard (quatter stailas) cun circa 400 letgs. La commerzialisaziun da las abitaziuns vegn surdà ad ina firma spezialisada ed activa sin plaun internaziunal. Resort e hotel duain furmar ina unitad economica.