Siglir tar il cuntegn

Header

cuntegn

Grischun Central Savognin di na a la fusiun dals cumins baselgia en Surses

Il cumin baselgia da Savognin ha ditg na a la fusiun dals cumins baselgia dal Surses. Uschia datti dus cumins baselgia en il Surses.

Savognin di na a la fusiun dals 10 cumins baselgia dal Surses. Cunquai che la suprastanza dal cumin baselgia da Savognin haja proponì da na betg fusiunar, na saja quai era betg stà ina surpraisa ha, Clemens Poltera, il manader dal project da fusiun ditg a Radiotelevisiun Svizra Rumantscha.

Ils resultats

audio
Savognin di na
ord RTR Audio dals 06.04.2016.
laschar ir. Durada: 3 minutas 6 Secundas.

Savognin di na cun 24 encunter 45 vuschs. Riom di gea cun 4 cuntravuschs. Beiva, Sur/Marmorera, Mulins, Rona, Tinizong, Cunter, Parsonz e Salouf dian unanim gea. Quests cumins baselgia furman ussa il nov cumin baselgia cun il num cumin Baselgia roman catolic Surses.

Fusiun vegn probabel acceptada dal Corpus catholicum

Davart da la baselgia catholica dal chantun Grischun ha il president Placi Berther manegià che quest resultat na saja betg optimal. In cumin baselgia sur l’entir intschess dal Surses fissi stà meglier. Il Corpus catholicum vegnia dentant il pli segir ad acceptar questa fusiun.

Ils dus cumins baselgia ch’en dapi oz realitad en il Surses, correspundan omadus a las pretensiun ch’il Corpus catholicum ha fatg. El pretenda numnadamain ch’in cumin baselgia dovri tranter 600 e 1000 parochians per survegnir sustegniment. Savognin ha 730 parochians ed ils ulteriurs cumins baselgia ch’èn ussa fusiunads vegnan sin passa 1000 parochians. Previs èsi ch’il nov cumin baselgia cun il num Cumin baselgia roman catolic Surses giaja en vigur l’entschatta da l’onn 2017.

Artitgels legids il pli savens