Siglir tar il cuntegn

Grischun Central Savognin - cun 20 sutgas e 10 pults en l’ultim onn da scola

La terza superiura dal Surses survegn ina buna basa per ses ultim onn da scola: Sch’ella riva glindesdi a scola spetgan sutgas e bancs novs. RTR ha visità il pedel Markus Margreth.

Legende: Video Sutgas van e sutgas vegnan abspielen. Laufzeit 02:08 Minuten.
Or da RTR dals 19.08.2016.

30 onns veglia è la chasa da scola Barnagn a Savognin – ed uschè veglias èn er stadas las sutgas ed ils pults èn la stanza da scola da la terza superiura.

Da midar quai è ina da las ultimas lavurs preparativas dal pedel Markus Margreth avant che la scola cumenza danovamain. Questa giada survegnan las scolaras ed ils scolars da la terza superiura sutgas e pults novs.

Fin da vacanzas – temp per mobiglia nova

Venderdi a bun’ura las 08:30 furnescha Hanspeter Kummer da la Kummer Transport da Hombrechtikon las sutgas ed ils pults. I dat 20 sutgas novas e 10 pults novs per ina stanza da scola.

Quai è in’investiziun da radund 13’000 francs, quinta Jürg Bühler, il manader da la scola. Dapi tschintg onns renoveschan els successivamainil mobigliar en scola. E cler ch’ils scolars e las scolaras da l’ultim onn da scola possian emprender uschia anc meglier che enfin uss, surri Bühler.

Nagin interess vi da las mobiglias veglias

Cun agid da Markus Margreth ha chauffeur Kummer svelt distgargià il material nov e prendì encunter il vegl. Kummer è rivà da Laax, nua ch’el ha er gia furnì mobiglias da scola e cuntinua suenter Savognin cun l’ultima part da la chargia a Tavau.

Nua ch’el giaja cun las sutgas veglias? Gea, raquinta Kummer, era sch’il material para anc tut en urden, saja probabel ch’el vegn dismess. Magasinar el na rendia betg.

Ultimas preparativas per 90 scolaras e scolars da tut il Surses

Fertant che las scolaras ed ils scolars giaudan anc ils ultims dis da vacanzas, èn ils magisters gia vi da las ultimas lavurs per il nov onn da scola. Quel cumenza glindesdi per 90 scolaras e scolars da tut il Surses. Dapi la fusiun vegnan sper quels dal stgalim superiur era ils scolars da tschintg- e sisavla primara en la chasa Barnagn.

Sutgas e pults èn si en l’emprim plaun en la stanza da Daniel Spadin, ch’è vi da las preparativas. Uss che tut è al dretg lieu sustegna Markus Margreth anc ils magisters – e suenter è tut «en rughel» per che la vita sappia turnar danovamain en chasa da scola.

RR actualitad 08:00 +