Siglir tar il cuntegn
Inhalt

Grischun Central San Bernardino resta serrà

Tenor la Polizia chantunala resta il tunnel serrà per plirs dis en omaduas direcziuns pervi dal brischament da l'autocar.

Legende: Video Incendi d'in autocar en il tunnel dal San Bernardino abspielen. Laufzeit 01:50 Minuten.
Or da Telesguard dals 18.05.2018.
  • In autocar da la Germania ha piglià fieu en il tunnel dal San Bernardino.
  • Tenor indicaziuns da la polizia han tut ils passagiers ed er automobilists damanaivel dal brischament pudì bandunar a temp il lieu.
  • Il tunnel resta serrà tschintg fin set dis pervi da lavurs da reparatura

Per camiuns è l'autostrada serrada tranter Tusaun e Roveredo. Er ils Autos da Posta tranter San Bernardino e Valrain na cursechan perquai betg. Uschia èsi tenor Viasuisse da quintar cun in temp da viadi pli lung. I vegn cusseglià da guntgir sur la A2 ed il tunnel dal Gottard.

L'auta temperatura dal fieu ha donnegia parts dal palantschieu. Tenor experts da l'Uffizi federal cuzzan las lavurs da reparatura tschintg fin set dis. Pir cura che quellas èn fatgas vegn il tunnel puspè avert.

Naginas unfrendas

Tenor indicaziuns da la Polizia chantunala han tut ils passagiers pudì bandunar l'autocar a temp. Er ils automobilists damanaivel da l'autocar hajan pudì bandunar il lieu dal brischament.

Duas persunas sajan vegnidas tractadas pervi da levas tissientadas da fim. Anita Senti, la pledadra da la Polizia chantunala, discurra da cletg ch'i na saja betg capità insatge pli gravant. Sin maletgs en pliras medias svizras è stà da vesair bler fim che vegniva ord in chamin da la ventilaziun dal tunnel.

Pass avert per il traffic lev

Il pass dal San Bernardino è avert per autos da persunas cun ina paisa da fin 3,5 tonnas ed ina ladezza da maximalmain 2,30 m. Rulottas na dastgan betg duvrar la via sur il pass.

RR novitads 15:00 ++