Tenor Marco Ronchetti da l'Uffizi federal da las vias ASTRA saja la finamira, da puspè pudair avrir il tunnel la gievgia la damaun. La decisiun definitiva vegnia fatga damaun mesemna saira.
Tenor l'ASTRA era vegnì donnegià in traject da radund 100 meters dal tunnel fermamain tras l'incendi. Cun lavurar tut la fin d'emna passada hajan ins gia pudì substituir quasi tut ils indrizs electromecanics ed indrizs da segirezza. Il palantschieu intermediar, che separa il tunnel dal chanal da ventilaziun, saja vegnì enfirmì e stabilisà per ch'il traffic possia puspè circular uschè spert che pussaivel.
Il palantschieu intermediar dal tunnel era vegnì donnegià il venderdi passà perquai ch'in bus era ars en il tunnel. El aveva piglià fieu radund 500 meters davent dal portal dal nord. Ils 22 passagiers ed er ils automobilists damanaivel dal brischament avevan pudì bandunar il lieu da l'accident a temp.
En consequenza era vegnì serrà il tunnel – ed è restà serrà sur tut la fin d’emna da Tschuncaisma. Unic il traffic fin 3,5 tonnas ha pudì vegnir svià sur il San Bernardino. Il traffic da Tschuncaisma aveva procurà per colonnas da record avant il portal nord dal tunnel dal Gottard.
RR novitads 17:00
