Siglir tar il cuntegn

Header

audio
Saira: Dieta da vischnancas – dispitas da linguatg durant radunanzas communalas
Or da Actualitad dals 18.09.2019.
laschar ir. Durada: 3 minutas 14 Secundas.
cuntegn

Rumantsch durant radunanzas La lingua uffiziala dal Surses vegn messa en dumonda

La lingua uffiziala e da scola da la vischnanca Surses è il rumantsch. Durant la radunanza communala vegnan las infurmaziuns impurtantas projectadas vi da la paraid. Quai na tanscha però betg a tuts: En brevs da lecturs vegn pretendì, che la vischnanca resguardia meglier quels da lingua tudestga.

La vischnanca da Surses veglia tegnair ferm vid la pratica da manar tras la radunanza communala per rumantsch, ha ditg Giancarlo Torriani, suprastant da Surses. Tgi che fetschia ina dumonda en talian u en tudestg durant la radunanza communala, survegnia dentant era en l’avegnir la resposta en sia lingua materna.

A Zernez ston ins chapir rumantsch

Era a Zernez è la radunanza communala en rumantsch. En dumonda na saja quai mai vegnì mess, ha ditg Emil Müller, il president communal. Durant la radunanza communala saja pussaivel da far dumondas en tudestg, la resposta dettia quai però mintgamai per rumantsch.

Medel/Lucmagn respunda era per tudestg

A Medel/Lucmagn vegn la radunanza communala era manada tras per rumantsch. Quai saja impurtant per il mantegniment dal linguatg, ha ditg il president communal Rico Tuor. Sch’ina persuna da lingua tudestga dumondia insatge per tudestg, dettia quai era ina resposta per tudestg.

RR actualitad 17:00

Artitgels legids il pli savens