Siglir tar il cuntegn

Header

cuntegn

Grischun Central Retard per las novas structuras da l’ospital Savognin

La fundaziun dal spital Savognin Alfons Pianta vegn transfurmada en la societad d’aczias Center da Sanadad Savognin. Quai ha decidì la gievgia saira il «Cunsegl dalla tera digl cirquit Surses».

Il presidi dal Center da Sanadad Savognin SA surpiglia il president da la cumissiun dal spital vertent, Clemens Poltera (Rona). Ulteriurs commembers dal cussegl d’administraziun èn Filip Dosch (Cunter), Mario Evangelista (Flums), Guido Luzio (Savognin) e Domenika Schnider Neuweiler (Cuira).

audio
Bunura: Retard per il midament da l’ospital Savognin
ord Actualitad dals 24.04.2015.
laschar ir. Durada: 2 minutas 34 Secundas.

Confusiun davart las cumpetenzas

Atgnamain aveva il «Cunsegl dalla tera digl cirquit Surses», sco era il suveran dal Surses (440:60 vuschs) gia approvà la transfurmaziun l’atun da l’onn passà, uschia che la Societad d’aczias Center da Sanadad Savognin avess stuì ir en vigur il 1.1.2015. Pervi d’ina confusiun davart las cumpetenzas, datti ussa però in retard: Eleger il cussegl d’administraziun da la nova societad d’aczias avess stuì l’organ vegl, il Cunsegl dalla tera, e betg la cumissiun dal spital ensemen cun las 9 vischnancas dal Surses, ha ditg Baltermia Peterelli, il president da l’Uffizi cirquital Surses.

Chantun sto anc dar il OK

La transfurmaziun en ina societad d’aczias sto anc vegnir approvada da la surveglianza da fundaziuns dal chantun Grischun. Suenter po la nova societad d’aczias ir en vigur. Questa midada daventa necessaria pervi da la schliaziun planisada dals circuls.

Artitgels legids il pli savens