Siglir tar il cuntegn

Grischun Central Retard per il cumplex da Kino Cuira

Pervi d’in recurs tar la Dretgira administrativa grischuna sto la societad da construcziun City West spetgar cun bajegiar il Multiplex–Kino a Cuira.

Visualisaziun dal cumplex da Kino Cuira.
Legenda: Uschia vess il cumplex cun otg salas da kino da vesair ora. MAD

Ils recurrents sajan vischins da l'areal City West e quels pretendian da sistir la lubientscha da construcziun. Quai ha il president da la dretgira ditg sin dumonda dal schurnal regiunal da radio SRF. Tge che vegn dentant crititgà vid quest project, n'ha el betg ditg. Inizialmain era planisà da cumenzar cun las lavurs da construcziuns la primavaira 2017. Lura èsi dentant ì pli ditg enfin che la lubientscha da construcziun era sin maisa ed uss dat quai in’ulteriur retard.

Program da divertiment multifar

En il vest da la citad da Cuira è planisà in grond kino cun otg salas, ina halla polivalenta ed in implant da minigolf. Il project è calculà cun 40 milliuns francs. El duai vegnir manà da la «Kitag», ina firma che maina tranter auter gia kinos a Berna, Turitg e Son Gagl.

RR actualitad 09:00