Siglir tar il cuntegn

Grischun Central Realü: ils daners mancan

La fundaziun Realü, ch’è preschenta a differentas occurenzas cun sia ambulanza, sto remplazzar ses vehichel actual. In’acziun da crowdfunding n’ha dentant gì nagin success.

Gian Maria Marri (dretg) e David-Ueli Rade il mainafatschenta (segund da dretg) davant in'ambulanza affitada per la festa da gimnastica da Tusaun.
Legenda: Gian Maria Marri il vicepresident (dretg), David-Ueli Rade il mainafatschenta (segund da dretg) a Tusaun. RTR, F. Belotti

Sco quai che Gian Maria Marri, il vicepresident da la fundaziun ha ditg, ins haja rimnà mo 3‘500 francs, empè dals 50‘000 francs spetgads. Perquai che la limita na saja betg vegnida cuntanschida, giajan ils daners ussa enavos als donaturs.Ussa ponderescha la Realü, da far accessibla l’acziun da crowdfunding ad in public pli vast, quai cun translatar il text era en englais.

Nova ambulanza custa ina quart milliun

L’ambulanza acutala da la Realü sto vegnir remplazzada perquai ch’ella è vegnida en ils onns e chaschuna bleras reparaturas. Ils custs totals da la nov’ambulanza muntan a 250’000 francs. Ils 50'000 francs eran previds sco emprima transcha per finanziar il nov vehichel. Tenor Gian Maria Marri ins pondereschia ussa era da cumprar in'occasiun per remplazzar l'ambulanza veglia. El quinta cun ina soluziun ils proxims mais.