Siglir tar il cuntegn
cuntegn

Grischun Central Radund 900 visitaders al «Bergfahrt Festival»

L'uniun «Bergfahrt Festival» fa ina bilantscha positiva: L'aura e l'atmosfera saja stada buna, e las reacziuns sajan fitg positivas, surtut quai che pertutgia la diversitad da las preschentaziuns. En congual cun l’emprim festival avant dus onns, haja quai gì bun in terz dapli visitaders.

Ils Sepplis da Brauégn ensemen cun Erich Eicher dals Bündner Spitzbueba en il hotel Kurhaus.
Legenda: Ils Sepplis da Brauégn ensemen cun Erich Eicher dals Bündner Spitzbueba en il hotel Kurhaus. RTR, Federico Belotti

Las spetgas quai che pertutga il dumber dad entradas vendidas sajan vegnidas ademplidas, ha ditg Annina Giovanoli, la manadra da producziun dal festival. Quel ha gì in preventiv da 220’000 francs. Probabel possia quel vegnir tegnì en, era sch’i na saja betg da quintar cun reservas per l’auter festival. Dal chantun datti ina garanzia da deficit.

Divers artistas ed artists rumantschs

Diversas producziuns dal festival da la cultura alpina han gì in connex cun la lingua rumantscha. Uschia èn per exempel stads da vesair a Bravuogn il clarinettist Domenic Janett ed il ghitarrist Robert Grossmann, ch’han fatg in concert cuminaivel e raquintà anecdotas. Quest eveniment en la baselgia è stà visità da franc 250 persunas, uschia Annina Giovanoli. Er da la partida èn stads Leo Tuor, ch’ha legì or da ses pli nov roman, u Aliesch Vital, ch’ha creà entaifer trais dis ina sculptura da fier vegl. Bibi Vaplan ha chantà chanzuns da ses nov album rumantsch «Cler cler».

Festival cuntinuescha

Gia decidì è: I vegn a dar ina terza ediziun dal Bergfahrt Festival a Bravuogn: Quel ha lieu dals 5 fin ils 7 da zercladur dal 2020.

RR novitads 17:00