Siglir tar il cuntegn

Header

cuntegn

Radunanza communala Alvra 2,9 milliuns per ulteriurs projects da la bova Brinzauls

La radunanza communala da la vischnanca d’Alvra ha approvà ier saira unanimamain divers credits, tranter auter er en connex cun la bova da Brinzauls. Per l’ina in credit brut da 1,5 milliuns francs per ulteriuras analisas da la bova. Per l’autra in credit brut da 1,4 milliuns francs per il project da construir ina galaria da drenascha.

Las ulteriuras analisas da la bova duain meglierar ils models da prognosa per il moviment en il futur. Confederaziun e chantun han mess en vista contribuziuns per 90% dals custs dal project. Il rest dals custs duai vegnir partì sin la vischnanca d'Alvra (5%), l'Uffizi chantunal da construcziun bassa (3%) e la Viafier Retica (2%).

Suenter ch'il tunnel da sondagi è finì e sch'i sa mussia che la drenascha funcziuneschia, duai il tunnel vegnir engrondì ad ina galaria da drenascha. Per che quellas lavurs possian cumenzar uschè spert sco pussaivel, duai gia uss vegnir intercurì sch'ina tala galaria è realisabla, e vegnir elavurà in project da construcziun, tras l'uffizi da construcziun bassa. Per pudair far quai, dovri ulteriurs sondagis verticals da radund 150-200 meters lunghezza.

Era per ils custs dad 1,4 milliuns francs da quest project han Confederaziun e chantun mess en vista da surpigliar 90%. Tgi che paja quant dal rest sto anc vegnir definì.

Via da guaud e quint annual

La radunanza communala ha era approvà in credit per il mantegniment da la via da guaud «Vals» ad Alvagni. Plinavant han ils dad Alvra era approvà il quint annual da l’onn passà. Quel serrà cun in surpli d’entradas da 877'000 francs. Quai tar expensas da 15,7 milliuns francs. Budgetà era in minus da radund 600'000 francs.

Il president communal da la vischnanca Alvra  Daniel Albertin durant la radunanza communala da gievgia saira.
Legenda: Il president communal da la vischnanca Alvra Daniel Albertin durant la radunanza communala da gievgia saira. FMR Sandra Balzer
audio
Per tadlar: curt e cumpact
ord RTR Audio dals 15.07.2022.
laschar ir. Durada: 1 minuta 6 Secundas.

RTR novitads 06:00

Artitgels legids il pli savens