Siglir tar il cuntegn
Inhalt

Grischun Central Prendì en maun la pala per abitaziuns da seniors a Savognin

A Savognin è stada l’emprima badigliada uffiziala dal Center da Sanadad Savognin. Las 21 abitaziuns per seniors duain esser prontas la primavaira 2019.

Legende: Video Savognin fabritga per ses seniors abspielen. Laufzeit 01:44 Minuten.
Or da Telesguard dals 29.08.2017.

En tut datti 14 abitaziuns da 2,5 stanzas e 7 abitaziuns da 3,5 stanzas. L’atun 2015 aveva Raphael Zuber da Cuira gudagnà ina concurrenza d’architectura. A la concurrenza eran sa participads otg architects dal Grischun, da quels trais dal Surses.

Clemens Poltera, il president dal cussegl d'administraziun dal Center da Sanadad SA.
Legenda: Clemens Poltera, cussegl d'administraziun. RTR, Federico Belotti

Midadas vi dal project oriund – tranter auter in tunnel direct

Sco quai che Clemens Poltera, il president dal Center da Sanadad Savognin SA ha ditg, haja quai dà diversas midadas vid il project. Quel saja vegnì spustà per radund 60 meters en direcziun da Tinizong. Plinavant dettia be 21 abitaziuns enstagl da 30.

I vegn uss tuttina era a dar ina colliaziun directa en il spital cun in tunnel: Quella varianta era vegnida stritgada temporarmain or dal project.

Diesch milliuns francs per 21 abitaziuns per seniors

Las emprimas lavurs han gia cumenzà avant in pèr emnas.
Legenda: Las emprimas lavurs han gia cumenzà avant in pèr emnas. RTR, Federico Belotti

Ils custs dal project vegnan budgetads sin radund diesch milliuns francs. La primavaira dal 2019 duessan las abitaziuns esser prontas. I dettia gia differents interessents per las abitaziuns, ha ditg Clemens Poltera.

Contracts da locaziun na vegnan per il mument però betg anc fatgs – ils pretschs n’èn betg anc definitivs. Igl è da quintar cun pretschs tranter 1'200 e 1'600 francs al mais.

RR actualitad 17:20