Siglir tar il cuntegn

Grischun Central Premiera grategiada en la tur d'Origen

Il festival cultural Origen finescha ses ciclus da Nadal cun il teater da sault «Magi». La premiera da gievgia saira è stada vendida ora. 210 persunas han visità il toc.

En il toc «Magi» raquinta la choreografa Giapunaisa Yuka Oishi la legenda russa dal quart retg, e quai da nov sco parabla sur da l'esser uman, sur dal far naufragi, sur da deblezzas e sur da perfecziun. Sin la tribuna stattan sautunzas e sautunzs da differentas culturas: Acrobats Giapunais fruntan sin solists da ballet europeics. La choreografa Yuka Oishi è stada plirs onns solista al ballet renumà da John Neumeier a Hamburg. La premiera da gievgia saira è grategiada: La fin hai dà in grond e lung applaus cun «standing ovations».

Legenda russa

Il quart retg vuleva tenor la legenda russa render omagi al novnaschì figl dal retg a Betlehem. Sin ses viadi è el dentant ì a perder. Ses regals ha el repartì a glieud che pativa da la fom, ed a persunas senza tetg. Per spendrar ina famiglia, ha el suffrì strapatschs sin ina galera. 30 onns pli tard è el vegnì cun mauns vids en la Terra sontga ed è vegnì perditga da la crucificaziun da Jesus.

Anc datti paucs plazs

Ulteriuras preschentaziuns datti ils 24 e 25 da favrer, sco era ils 1, 2 e 3 da mars. Sco quai che Origen scriva en ina communicaziun, dettia quai mo pli paucs plazs libers.

La tur dal Gelgia curt avant la premiera da Magi.
Legenda: La tur dal Gelgia curt avant la premiera da Magi. RTR, Federico Belotti

RR actualitad 12:00