Il motiv per surdar il Premi Wakker 2018 a la Nova Fundaziun Origen è il patrimoni cultural local che ha grazia ad Origen, in'influenza che surpassa ils cunfins regiunals. Quai scriva la Protecziun da la Patria en ina communicaziun.
Dapi il 1972 saja il Premi Wakker da la Protecziun da la patria mintg'onn vegnì surdà ad ina vischnanca. Quest'onn datti in'exepcziun: Per l'emprima giada survegn in'organisaziun da la societad civila il premi desiderà.
Riom è confruntà cun la midada da structura
La Nova Fundaziun Origen, fundada il 2006, e ses festival cultural Origen han lur center a Riom en il Surses. Sco blers vitgs en las regiuns perifericas da la Svizra è era Riom confruntà cun la midada da structura, la depopulaziun e consequentamain cun blers edifizis nunutilisads.
Sviluppar in avegnir ord l'agen patrimoni cultural
La fundaziun vesia ils edifizis custaivels vids en il vitg sco schanza per l'avegnir, scriva la Protecziun da la Patria. Enstagl da planisar in nov tempel cultural per ses festival da success, haja la fundaziun decidì da tgirar il patrimoni architectonic sco caracteristica particulara e d'utilisar quel plain respect per novas represchentaziuns.
Nova vita en il vitg
Origen utilisescha il patrimoni architectonic a Riom sco fund da resonanza e sco lieu d'acziun e da producziun per s'occupar artisticamain cun il grond stgazi da chanzuns e d'istorgias da la regiun. La fundaziun na chapeschia il vitg muntagnard betg mo sco culissa per ses festival, mabain haja l'intenziun d'activar las resursas existentas en il lieu.
Novas perspectivas per il turissem en il territori muntagnard
Partind da l'agen patrimoni cultural saja reussì ad Origen da sviluppar in'attracziun che tanscha lunsch sur ils cunfins da l'atgna vallada ora. Tge che vegn producì a Riom resuna en l'entir chantun, en l'entira Svizra e schizunt a l'exteriur. L'engaschament da la fundaziun saja exemplaric per ils potenzials economics en il territori da muntogna, scriva la Protecziun da la Patria en sia communicaziun.
Dar nova vita al patrimoni architectonic
Da bell'entschatta tschertga Origen vias da render utilisabel tant a moda pragmatica sco era cun responsabladad il patrimoni architectonic per ses intents, uschia la Protecziun da la Patria. Il chastè da Riom cun muntada simbolica, ma dapi decennis nunutilisà, daventia lieu da represchentaziun independent da l'aura. Per pussibilitar in manaschi durant tut l'onn dettia la fundaziun nova vita al bain da la famiglia-pastiziera Carisch che na vegn dapi daditg betg pli duvrà: il clavà daventa lieu da represchentaziun e la villa Carisch foyer e lieu da barat. La chasa da scola serrada serva sco local d'emprova e biro da producziun. Ed ulteriurs pass vegnan a suandar.
Bregaglia: Dapli pernottaziuns, sensibilisaziun ed ina gronda festa
En il 2015 è Bregaglia vegnì undrà cun il premi Wakker perquai che la vischnanca ha mantegnì sia architectura e la cuntrada cultivada. En quest onn hajan ins pudì registrar dapli giasts, declera Anna Giacometti, presidenta communala da Bregaglia.
Suenter in onn saja l' attenziun lura sa drizzada sin la proxima vischnanca ch' è vegnida undrada. «Il premi ha mussà che nus essan sin la dretga via ed ha sensibilisà l' autoritad da construcziun.» Vitiers ha la vischnanca organisà ina festa cun gronda participaziun. Var 500 persunas èn stadas presentas. «In bel record ch' è restà en memoria», uschia Giacometti.
RR actualitad 11:00
