Siglir tar il cuntegn
cuntegn

Grischun Central Pli gronda parti da «goa» da la Svizra vegn preparada

La fin dal mais cumenza la 8avla ediziun dal festival da musica electronica a Rona e Mulegns. Era quest onn spetgan ils organisaturs dal « Summer Never Ends Festival » dapli che 11'000 persunas.

Actualmain vegnan installadas sin la planira da Rona sin il territori dals Mulegns tut las tendas e tribunas per il festival. «Per il festival avain nus in preventiv da dus milliuns francs», ha ditg Corinne Rageth, la pledadra da l’Uniun Klangwerk.

Organisaturs quintan cun dapli

L’emprim festival cun musica sin la planira da Rona è stà il 2006, mintg’onn haja il festival dumbrà dapli aspectaturas ed aspectaturs. Tar la davosa ediziun dal 2013 hai gì 9’000 ch’han visità il festival, e quest onn quintan ils organisaturs cun 11’000 – 12’000 visitaders.

Il festival ha lieu mintga dus onns. Quai haja da far cun la gronda lavur organisatorica e per schanegiar il terren, ha ditg Corinne Rageth. En tut occupa il Summer Never Ends Festival ina surfatscha da prest 30 hectaras ch’èn en possess da 15 differents purs. Per il festival lavuran radund 600 persunas, per gronda part voluntaris, e circa 400 musicists.