Siglir tar il cuntegn
Inhalt

Grischun Central Plans mo sin palpiri – construir ina praschun n'è betg simpel

Durant ils proxims trais onns vegn construida la nova praschun serrada a Cazas. Las mesiras da segirtad èn rigurusas.

Il plazzal da la nova praschun Realta.
Legenda: Las lavurs da construcziun da la nova praschun Realta han cumenzà l'atun 2016. RTR, Federico Belotti

Ils plans da construcziun da la nova praschun vegnan classifitgads en duas categorias:

  • L’emprima categoria èn plans d’architectura e plans da la tecnica da chasa cun plans dal stgaudament ed indrizs sanitars.
  • La segunda categoria pretenda mesiras da segirtad pli autas. En questa categoria van l’electroplanisaziun ed ils indrizs da segirezza.
Andrea Pfister, da l’uffizi da construcziun auta è responsabel per la planisaziun da la nova praschun.
Legenda: Andrea Pfister, da l’uffizi da construcziun auta è responsabel per la planisaziun da la nova praschun. RTR, Federico Belotti

Quels plans vegnan per exempel mo surdads a las interpresas en furma stampada, uschia che naginas infurmaziuns pon sa derasar nuncontrolladamain en la rait. Sco quai che l’architect da l’uffizi da construcziun auta Andrea Pfister ha ditg, na vesa nagin tut ils plans da segirtad da la praschun, mabain mintga planisader e lavurer be la part ch'el dovra.

Plinavant stoppian ils lavurers suttascriver in contract da confidenza e mussar in extract dal register penal. Dals radund 100 lavurers ch’èn involvids haja quai enfin oz dà mo ina refusaziun.

A partir da la stad 2019 duai la nova praschun serrada porscher plaz a 152 praschuniers. Ella vala sco remplazzament per la praschun Sennhof a Cuira. Ils custs muntan a 120 milliuns francs, 33 milliuns paja la confederaziun.

RR actualitad 17:20