Pendicularas Savognin: minus 10,9% entradas

Las Pendicularas da Savognin SA han gì 10,9% pli paucas emprimas entradas l’onn da fatschenta 2015/16. La rendita totala è cun 8,03 milliuns francs bun set pertschient sut las cifras dal 2014/15.

Markus Schröcksnadel, il president dal cussegl d'administraziun da las Pendicularas Savognin SA beneventa 163 acziunaris.

Legenda da maletgs: Markus Schröcksnadel, il president dal cussegl d'administraziun da las Pendicularas Savognin beneventa 163 acziunaris. RTR, Federico Belotti

Las expensas da manaschi èn sa reducidas per 11,6% ed igl è sa resultà in cashflow da 1,53 milliuns francs (+14,8%). Uschia è la 54avla radunanza generala vegnida infurmada la sonda suentermezdi.

Leo Thomann - la testa nova en il cussegl d'administraziun

Adattaziuns hai dà vi dals statuts da las Pendicularas Savognin SA. Uschia na sto il cussegl d’administraziun betg pli avair trais enfin set commembers. Da nov po el sa cumponer era mo dad in commember u da plirs. Per la perioda d’uffizi dals proxims trais onns na datti pertutgant la cifra anc naginas midadas.

Midada s'ha la cumposiziun dal cussegl d'administraziun: Suenter la reelecziun da Markus Schröcksnadel, Anton Schmidl, Peter Schmidl, Martin Fritsch, Leo Jeker e Renzo Cavegn ha la radunanza elegì a Leo Thomann, il president communal da Surses, en il cussegl d'administraziun. El remplazza Patric Vincenz, l’anteriur president communal da Savognin.

Snowpark, agid da satellits ed sustegn per affittar abitaziuns

Visualisaziun dal nov Snowpark a Somtgant.

Legenda da maletgs: Visualisaziun dal nov Snowpark a Somtgant. mad

Plinavant ha la radunanza generala infurmà davart sias novaziuns: A Somtgant vegni a dar a partir da la proxima stagiun d’enviern in snowpark cun sigls ed obstachels. Il proxim enviern vegnan fatgs tests cun il «Snow Sat», in sistem da gps che po mesirar la profunditad da la naiv durant il far pista.

Per survegnir dapli glieud sin la pista, fan las pendicularas il mument reclama en las scolas. Plinavant offreschan las pendicularas sustegn per affittar abitaziuns. Possessurs d’abitaziuns pon surdar a las pendicularas la commerzialisaziun da lur abitaziun da vacanzas - e quai davent da la surdada da la clav enfin tar la schubregiada da l’abitaziun.