Siglir tar il cuntegn

Header

cuntegn

Pendicularas Savognin Fitg pitschen gudogn malgrà corona

Las Pendicularas da Savognin han fatg in gudogn da 3'360 francs il davos onn da fatschenta 2020/21, quai tar ina svieuta da passa 7,5 milliuns francs. En congual cun l’onn da gestiun avant, è quai in minus da 7%.

Sco quai che las Pendicularas da Savognin SA scrivan en lur rapport annual, saja l’enviern passà stà in onn difficil. Surtut l’entschatta sur Nadal e Bumaun saja stada difficila. Pervi da la pandemia da corona sajan las frequenzas ferm sut l’enviern avant. Gruppas, scolas e viadis da bus hajan mancà quasi cumplettamain. Las circumstanzas dal turissem ch’eran gia avant difficilas vegnian uss anc engrevgiadas cun corona e quai haja bain era consequenzas per ils proxims onns, uschia Markus Schröcksnadel, il president dal cussegl d’administraziun da las Pendicularas da Savognin.

Legenda: La stad è stada legraivla per las Pendicularas Savognin. Federico Belotti

Stad allegraivla

Allegraivel saja dentant che la stad saja stada buna, en congual cun l’onn avant haja dà in grond plus tar las emprimas entradas. Represchentativ na saja quai però betg - il 2019 n'era numnadamain la pendiculara da Savognin a Tigignas anc betg en funcziun. Allegraivel saja che las entradas da traffic hajan nudà in plus da 4.4%. Quai haja da far cun ina midada da las tariffas, e cun ina media da la svieuta per giast pli auta, cun quai ch’i na deva naginas gruppas e nagis giasts da bus.

RTR novitads 15:00

Artitgels legids il pli savens

Scrollar a sanestra Scrollar a dretga