Siglir tar il cuntegn

Header

cuntegn

Grischun Central Pendicularas da Lai ston spargnar

L’ustaria da muntogna «Mottahütte» en il territori da skis da Lai na vegn betg bajegiada sco previs questa stad. Pervi dals affars flaivels da questa stagiun d’enviern han las Pendicularas da Lai decidì, da spustar il project per in onn.

Peter Engler, il CEO da las Pendicularas da Lai SA ha confermà ad RTR il rapport da la gasetta regiunala Novitads. Il project d’ina nova ustaria da muntogna vegn budgetà cun 7.5 milliuns francs. Ussa duain ils architects surlavurar anc ina giada ils plans, di Peter Engler. Actualmain ins saja 2.3 milliuns davos il budget.

Nagin nov parcadi

Spetgar stoppia er il project per in nov parcadi tar la staziun da val dal Corn Cotschen. «Avant che nus construin in parcadi per quatter fin tschintg milliuns francs che vegn duvrà mo paucs dis a l’onn, examinain nus autras pussaivladads sco in sistem da diriger il traffic», ha el ditg a la gasetta Novitads.

Novs chanuns da naiv

Betg sistì è il project d’ennavar las pistas tranter Proschieri, Curvalda e l’ustaria Pradaschier. Uschè spert che la lubientscha da bajegiar è avant maun duai quest project vegnir realisà, di il directur da las Pendicularas da Lai.

Artitgels legids il pli savens