Siglir tar il cuntegn
Inhalt

Grischun Central Pauc sustegn per la miniera Bellaluna

L’acziun da collecta ch’è vegnida lantschada avant in mez onn per la miniera da Bellaluna na marscha betg sco giavischà. In agid professiunal duai procurar per dapli donaziuns per la miniera en decadenza.

L'acziun da collecta na marscha betg uschè bain.
Legenda: L'acziun da collecta na marscha betg uschè bain. RTR, Federico Belotti

Per spendrar ils vegls mirs da l’anteriura miniera sper la via chantunala tranter Filisur e Bravuogn, duessan vegnir investids 380’000 francs. L’uniun «Amis da las minieras en il Grischun» ha lantschà ensemen cun l’uniun Parc Ela e la vischnanca da Filisur in’acziun per rimnar daners.

Pitschna summa da donaziuns

Sco quai che Elsbeth Rehm, la presidenta dals Amis da las minieras en il Grischun ha ditg, hajan ins enfin oz survegnì donaziuns da circa 7’000 francs. La Banca Chantunala haja plinavant concedì ina contribuziun da 3’000 francs, cura che las lavurs sajan fatgas. La Protecziun da monuments sa participescha cun 30% vi dals custs. Per pudair rimnar anc dapli daners ins haja dumandà l’agid da Innovage, ina uniun che lavura sin basa gratuita e nizzegia la savida da pensiunads. Uschia speran ils amis da las minieras da pudair rimnar dapli daners.

Sustegn da la vischnanca

Sa participar vi da la renovaziun da la miniera vul era la vischnanca da Filisur. Sco quai ch’il suprastant Dieter Müller ha ditg, ins veglia anc quest atun ir davant la radunanza communala cun ina dumonda da credit. Per tge summa ch’i giaja dependia da las donaziuns che sajan la fin finala en la cassa. Ina opziun saja dad etappar la sanaziun e far l’emprim las lavurs las pli impurtantas, per exempel stabilisar la pitga da l’anteriur furn ch’è en privel da cupitgar.

Istorgia lunga

La miniera da Bellaluna vegniva probabel nizzegiada gia en il quindeschavel tschientaner. La davosa giada è vegnì gudagnà metals avant l’onn 1840, cura che la fabrica è ida concurs. Dapi il 1982 stat il bajetg sut la protecziun da monuments.