Siglir tar il cuntegn

Grischun Central Pagina da Surmeir vul exister vinavant

La Pagina da Surmeir cumpara ina giada l’emna. Sche pussaivel duai quai era en l'avegnir esser uschia, ha ditg Gian Sonder il president da l’Uniun Rumantscha da Surmeir URS a la radunanza generala da glindesdi. Ins saja però avert per collavuraziuns, sche pussaivel però betg cun la Quotidiana.

Pagina da Surmeir
Legenda: La Pagina da Surmeir duai – sche pussaivel – era en l'avegnir cumparair ina giada l'emna. RTR, Alice Bertogg

Sco quai che Gian Sonder ha ditg, haja la URS gì contact cun la Somedia, ch’edescha tranter auter la gasetta regiunala «Novitats». Eventualmain dessi pussaivladads dad integrar la gasetta rumantscha «La Pagina da Surmeir» en la gasetta tudestga «Novitats».

Ina gasetta che cumpara mintga di, na vesa Sonder betg sco buna opziun, ils lecturs èn sa disads vi dal ritmus emnil. Sch'i fiss pussaivel era en l’avegnir da survegnir subvenziuns, lura vuless la URS vinavant edir sezza la Pagina da Surmeir, uschia Sonder. Il mument survegn la Pagina da Surmeir 100’000 francs ad onn da l’Agentura da Novitads Rumantscha ANR per ils artitgels che la gasetta surmirana surdat a l'ANR. Questa summa saja anc garantida enfin la fin dal 2019, ha ditg Sonder.

Pagina da Surmeir chaschuna deficit

Il quint da gudogn e sperdita da l’Uniun rumantscha da Surmeir da l’onn 2017 è negativ. Cun expensas da 343’186 francs è sa resultà in minus da 8'217 francs. La fin dal 2017 ha la URS gì activas da 48’252 francs. Per l’onn 2018 prevesa la URS cun expensas da 343’000 francs da far in minus da 7’200 francs. Cunquai che la Pagina da Surmeir ha midà avant curt la producziun sin in auter palpiri, spera la suprastanza da la URS dentant da vegnir ora cun ina nulla naira la fin da l’onn.

RR actualitad 07:00