Siglir tar il cuntegn
Inhalt

Grischun Central Origen è memia tard

Per finanziar il teater temporar sin il Pass dal Güglia, dovra il festival cultural Origen dapli subvenziuns dal maun public. Magari èsi però memia tard pervi dal budget dal chantun.

Model dal teater sin il Güglia vesair ora.
Legenda: Uschia duess il teater sin il Güglia vesair ora. RTR, F. Belotti

Sco quai che Martin Jäger, il schef dal Departament d’educaziun, cultura e protecziun da l’ambient ha ditg sin dumonda dad RTR, vegnia la dumonda da l’intendant da Origen Giovanni Netzer memia tard: «Mes departament ha dà giu il budget correspundent avant las vacanzas da stad, da ussa anc far midadas vi dal budget da l’auter onn è quasi impussibel». La fin finala sto però il Cussegl grond decider davart il budget proponì da la regenza, uschia Martin Jäger plinavant. La regenza avess uschia anc la pussaivladad da proponer midadas vi dal budget. Origen ha fatg la dumonda a la regenza, d’augmentar la cunvegna da prestaziun da 200’000 francs ad onn sin 480’000 francs.

Contribuziun unica: schanzas intactas

Plinavant ha Origen fatg la dumonda a l’Uffizi per economia e turissem, per ina contribuziun unica da 800’000 francs per la construcziun dal teater sin il Güglia e per l’infrastructura a Riom. Sco quai che Jon Domenic Parolini, il schef dal departament d’economia publica e fatgs socialsha ditg, vegnia la dumonda examinada. Pertutgant il plan da termins fissi anc adina pussaivel, da dar ina contribuziun unica per l’auter onn: «Ils meds per la promoziun da l’economia èn però fitg limitads, quai es in fatg». Da discutar vegnia franc a dar la limitaziun da quatter onns per il teater sin il Güglia, uschia Parolini plinavant.