Opposiziun cunter meglieraziun Lantsch

In comité cumbatta la meglieraziun planisada da Lantsch. La radunanza communala da Lantsch decida ils 30 da zercladur davart ina meglieraziun da 7,6 milliuns francs.

Ina chasa ed ina baselgia a Lantsch.

Legenda da maletgs: Ils possessurs da terren da Lantsch teman da perder terren davant lur chasas. RTR, F. Belotti

En la davosa ediziun da la gasetta regiunala «Novitads» fa il comité cunter la meglieraziun frunt cunter la meglieraziun. Investir 7,6 milliuns francs en ina meglieraziun per gist mo tschintg purs en vischnanca – quai saja memia bler. Plinavant vegnian destruidas bleras vias da viandar, e plirs kilometers via vegnian schlargiads sin 3,8 meters, quai tut saja memia bler. Betg acceptabel saja era ch’il terren ordaifer la zona da bajegiar stoppia vegnir mess a disposiziun per la meglieraziun. Quai muntia ina perdita da la valur dal terren, era sche quel vegnia cumpensà en in auter lieu èn ils arguments dals adversaris.

Vias ston vegnir sanadas

Per la vischnanca da Lantsch è la meglieraziun fitg impurtanta. Bleras vias veglias stoppian vegnir renovadas, e cun quai che bleras sajan en possess da privats, dovria quai ina meglieraziun, ha ditg il president communal da Lantsch Simon Willi. L’entira meglieraziun cuzzia radund 20 onns, uschia saja era l’investiziun da 7,6 milliuns supportabla senza problems per la vischnanca. El na quinta betg cun in augment dal pe da taglia pervi da la meglieraziun, sco quai ch’ils adversaris teman.

RR Actualitad 11:00