Carlo Uffer ch’ha ragischs surmiranas – ses bab è da Savognin – è creschì si a Bellikon en l’Argovia. Ensemen cun sia partenaria Lorraine Meier vegnan els a manar La Scuntrada a Tinizong. Sco quai che Carlo Uffer ha ditg sin dumonda da RTR, enconuschian els la regiun da lur vacanzas e sajan gia pli ditg sin la tschertga d’in local modern sco quel a Tinizong. El sezs lavuria gia plirs onns en la gastronomia ed en la hotellaria, ed omadus sajan cuschiniers. A partir da l’emprim da fanadur 2017 èn els responsabels per l’ustaria ch’è vegnida finanziada da la vischnanca.
Betg ademplì contract
L’enviern passà ha l’uniun da promoturs desditg il contract cun Uwe Schlomann e sia partenaria, ch’avevan cumenzà il fanadur 2016. Perquai che l’ustier n’haja betg ademplì las pretensiuns dal contract d’affittaziun hajan els desditg il contract, ha l'uniun argumentà la desditga.
