En tut vegnan montadas 90 pitgas novas sin ina lunghezza da otg kilometers, scriva la EWZ en ina communicaziun. Las pitgas novas da metal che paisan per part enfin 4,5 tonnas remplazzan las pitgas veglias da laina. Cun las novas pitgas saja quai era en l’avegnir pussaivel da garantir ina anc pli auta segirezza da provediment.
Ils custs muntan a tschintg milliuns francs. Tenor la EWZ na dettia nagins ulteriurs sgols. Las pitgas che stoppian anc vegnir installadas, vegnian transportadas cun camiuns spezials als lieus, nua ch’igl è gia vegnì preparà fundaments. Enfin a Domat èn las pitgas vegnidas transportadas cun la viafier.