Siglir tar il cuntegn

Header

cuntegn

Grischun Central Nova pendiculara Savognin cun sustegn da vischnanca

Ils 29 da matg decida la radunanza communala da Surses, sch’ella vul sa participar cun in emprest senza tschains da dus milliuns vi da las Pendicularas Savognin. Quellas vulan construir l’auter onn ina pendiculara da Savognin a Tigignas. Quella duai remplazzar la sutgera existenta.

Sco quai ch’igl è da leger en il messadi per la radunanza communala è la sutgera da quatter en funcziun suenter l’onn 1987. La concessiun spirescha ils 31 da schaner 2024. Las Pendicularas da Savognin SA na veglian betg nizzegiar ora quest temp maximalmain, e perquai duai la nova pendiculara ir en funcziun gia sin la stagiun d’enviern 2019/20. Tar la pendiculara nova sa tracti d’ina telecabina da 10 analog a la telecabina da la segunda secziun da Tigignas a Somtgant. Il trassé previs da la pendiculara nova vegn a restar pli u main medem sco quel da la sutgera existenta.

I fa prescha

Per pudair bajegiar la telecabina gia la stad 2019, saja d’entschaiver cun las lavurs da project gia l’onn current, scriva la vischnanca da Surses. Per tegnair en quest plan da termins saja necessari che la radunanza communala decida gia la proxima radunanza communala. Per il cas che la telecabina na pudess betg vegnir construida la stad 2019, duvrassi diversas revisiuns vi da la sutgera existenta. Quels custs muntan a radund in milliun francs. Quai avess la consequenza che la sutgera actuala vegniss duvrada anc enfin l’onn 2023.

Vender participaziun vi da Surses Alpin

La construcziun da la nova pendiculara custa radund diesch milliuns francs. La finanziaziun duess succeder cun 40% chapital agen e cun 60% chapital ester. Cun quai ch’ina part dal chapital agen disponibel da las Pendicularas Savognin SA è collià a la participaziun dal resort da vacanzas «Surses Alpin» èsi previs, da vender questa per la valita da stima respectivamain maximal dus milliuns francs a la vischnanca da Surses.

La construcziun da la telecabina nova duai succeder gia l’auter onn. Tuttina vul la societad disponer d’avunda peda per planisar e manar tras la vendita da las aczias da maniera accurata. Perquai èn ins sa cunvegnì cun la Pendicularas Savognin SA da conceder sco mesira transitorica in emprest senza tschains da dus milliuns francs – fin che la vendita da las aczias vegn manada tras.

L’amortisaziun da l’emprest succeda en ina giada suenter la vendita da la participaziun. En quest senn garantescha la vischnanca da Surses d’acquistar la participaziun da las Pendicularas Savognin SA vi da la Surses Alpin SA enfin il pli tard ils 31 da december 2022 per la valita da stima resp. maximal dus milliuns francs. Quai permess che betg in auter investider na cumpra gia pli baud la participaziun per almain las medemas cundiziuns e che la vischnanca Surses consenta a questa cumpra. En quest cas vegn l’emprest pajà enavos cun daner blut a la vischnanca.

Sustegn era dal chantun

A medem temp inoltreschan las Pendicularas Savognin SA al chantun Grischun ina dumonda per in emprest NPR, dal qual l’autezza n’è oz betg anc enconuschenta. Tenor las prescripziuns chantunalas ha la vischnanca da surpigliar la segirtad per emprests NPR. La cumpetenza per contractar segirtads enfin dus milliuns francs surstat a la radunanza communala (art. 30 cifra 5 da la constituziun communala). La dumonda davart la segirtad vegn suttamessa a la radunanza communala, suenter che la decisiun dal chantun davart l’emprest NPR è avant maun.

Svilup turistic è impurtant

La suprastanza communala è persvadida ch’il sustegn per la construcziun d’ina telecabina nova è raschunaivla e da grond’impurtanza per la vischnanca Surses, è da leger en il messadi. In access modern en il territori da skis e da viandar saja da grond’impurtanza per Savognin. Plinavant vegnia cun ina telecabina piglià dapli resguard sin la structura existenta da giasts (famiglias e seniors) – perquai ch’il transport saja pli confortabel cun ina telecabina che cun ina sutgera. Era la segirtad vegnia augmentada cun la telecabina, en spezial tar il transport d’uffants.

Ina tala pendiculara duessi en l'avegnir dar gia davent dal vitg da Savognin.
Legenda: Ina tala pendiculara duessi en l'avegnir dar gia davent dal vitg da Savognin. mad

RR novitads 06:00

Artitgels legids il pli savens