Siglir tar il cuntegn
cuntegn

Grischun Central Nov’entschatta grategiada da la biera da la Tumleastga

Dapi il 2008 producescha la cooperativa Rolpibrau il «Domleschger Bier». Suenter ina pausa da dus onns datti puspè la biera. Dapi il 2014 vegn la biera fatga en la sennaria veglia a Veulden, quai cun success scrivan ils responsabels.

Ils bierers da sanester: Pius Giger, Andrea Gredig, Marco Berger e Reto Brot.
Legenda: Ils bierers durant l'etichettar, da sanester: Pius Giger, Andrea Gredig, Marco Berger e Reto Brot. RTR, Federico Belotti
Pius Giger, il president da la Rolpibrau.
Legenda: Pius Giger, il president da la Rolpibrau. RTR, Federico Belotti

Avant curt ha la cooperativa Rolpibrau gì sia davosa seduta annuala. Sco quai ch'il president Pius Giger ha ditg, hajan ins actualmain 23 clients. Il 2016 saja vegnì producì diesch giadas biera, quai mintga giada 500 liters. La qualitad da la biera saja sin stan stabil e bun, ed ins veglia augmentar anc pli fitg la qualitad sin il livel d’ina biera Premium. Da nov vegnia fatg biera or da malt Gran Alpin. La svieuta dal 2016 (14’000 francs) saja s’augmentada per 221% en cumparegliaziun cun l’onn avant.

Reavertura grategiada

Pervi da problems finanzials aveva la bieraria da la Tumleastga serrà il manaschi l’onn 2012 a Tumegl. L’onn 2014 hai dà ina reavertura a Veulden en la sennaria veglia. Empè da sis differentas sorts biera vegn fatg oz mo pli ina sort.

Dapi l'onn 2014 vegn la biera fatga a Veulden.
Legenda: Dapi l'onn 2014 vegn la biera fatga a Veulden. RTR, Federico Belotti