Il project victur Scolopendra (inspirà dal num d'animal 'millipes' u 'Tausendfüssler') da la «Cuminanza da lavur chant da Rona» porschia ina soluziun architectonica optimala per sanar la via dal Güglia en il sectur da Rona, è persvadì l'uffizi da construcziun bassa en sia communicaziun a las medias.
Finalmain ina soluziun cumplessiva
Dapi l'adattaziun da la via dal Güglia (1935-1940) sajan vegnidas fatgas be las lavurs da mantegniment las pli necessarias tar il chant da Rona, scriva l'uffizi en sia communicaziun.
A partir da l'onn 2018 duai quest traject stretg e malsurvesaivel vegnir adattà a las pretensiuns odiernas – e quai tant en quai che concerna la segirezza cunter privels da la natira sco er en la charrabladad per il traffic pesant e da bus.
Project pretensius pretenda ina concurrenza cun dus stgalims
Cun quai ch'il project saja fitg pretensius saja el vegnì adattà aposta a las maschinas ed al savair da quellas interpresas, che exequeschan lura er las lavurs. Perquai ha l'Uffizi da construcziun bassa sa decidì da publitgar las lavurs en ina concurrenza per ina uschenumnada «prestaziun globala da dus stgalims», da lavurs d'inschigneria e lavurs da realisaziun da la construcziun.
Scolopendra è resultà da la selecziun anonima
Dad otg projects inoltrads anonimamain ha ina giuria tschernì la stad 2016 quatter projects per la segunda fasa da la concurrenza. En quella han quatter candidats pudì inoltrar lur project per l'adattaziun da la via dal Güglia. Quella runda ha gudagnà Scolopendra sco meglier project.
In millipes che custa 14,5 milliuns
En fanadur ha decidì la regenza da realisar per 14,5 milliuns Scolopendra. Sco ch'il Uffizi da conctrucziun bassa scriva, sa distinguia «cun ina soluziun robusta, persistenta ed economica» che sa «serpegia en moda eleganta per la costa stippa si ed ha perquai survegnì il num Scolopendra – latin per il millipes».
Ils projects da la concurrenza vegnan exponids publicamain dals 24 d'avust 2017 fin ils 7 da settember 2017, da glindesdi fin sonda (da las 8.00 a las 17.00), en la sala communala a Cunter.
RR novitads 12:00