Siglir tar il cuntegn
Inhalt

Grischun Central Midadas vi dal project per aua restanta Marmorera

L’atun 2016 ha la regenza permess da construir in indriz da dotaziun per il mir da serra Marmorera da l'Ovra electrica da Turitg, per restituir l'aua restanta. La planisaziun da detagl ha mussà ch'il basegn da spazi necessari è pli grond ch'il spazi ch'è avant maun al lieu dal project permess.

Il mument na dat il lai da Marmorera anc giu nagin'aua restanta.
Legenda: Il mument na dat il lai da Marmorera anc giu nagin'aua restanta. RTR, Gion Caviezel

Pervia da quai sto l'indriz da dotaziun vegnir spustà en il grip al pe dal mir, scriva la regenza en ina communicaziun. Uschia sto vegnir construida ina nova caverna. Il conduct da dotaziun è integrà en il mir da serra e maina da la gallaria dal scul da basa sur questa caverna che sto vegnir construida da nov e puspè enavos en la gallaria dal scul da basa.

L'edifizi da la centrala ch'era previs oriundamain en il sectur dal pe dal mir croda davent, tut las parts dal stabiliment vegnan construidas sut terra. L'aua da dotaziun vegn restituida sur in batschigl per transfurmar l'energia. Tut tenor la productivitad vegn installada ina turbina da dotaziun.

Far recurs è anc pussaivel

La dumonda d'approvar il project è exponida tar l'uffizi d'energia e da traffic ed er en la vischnanca da Surses per prender invista. Il temp da recurs munta ad in mais. Quel scroda ils 25 da fanadur.

Aua restanta obligatoria

Oz na dat il lai da fermada da Marmorera giu nagin’aua restanta. L’Ovra electrica da Turitg è ussa però obligadas da far quai. Per tuttina pudair nizzegiar l’aua restanta che va da nov en in aual, duai vegnir turbinada era quest’aua. Tut tenor tge indrizs che vegn installà, pudess l’aua restanta producir 1.3 enfin 2.9 milliuns uras kilowatt ad onn.

RR novitads 11:00