Siglir tar il cuntegn

Header

audio
Georg Dolf – il parent pers
Or da Marella dals 05.07.2020. Maletg: MAD Caper Nicca
laschar ir. Durada: 46 minutas 17 Secundas.
cuntegn

Marella Georg Dolf – il parent pers

Georg Dolf è, sco tschients auters da la Val Schons, emigrà. Quai era l’onn 1908, cura ch'el ha tschertgà ina meglra vita, l’emprim a Palermo e suenter en America. Ma chattà ha el cunzunt ina vita plain lavur.

Georg Dolf è naschì il 1889 a Donat, sco figl or da l'emprima letg dal «surmester» (scolast) Hans Dolf e da Margret Dolf-Nicca. Il bab è emigrà en California per 10 onns, cura che Georg aveva in onn. La mamma è emigrada il 1899 a New York ed ha laschà enavos il mattatsch. Georg Dolf è creschì si tar sia tatta a Donat.

Strusch che Georg ha finì la scola è era el emigrà. L'emprim a Palermo sco pastizier. E suenter, l'onn 1908 en California. Quai cun il bastiment Kaiser Wilhelm II.

Bastiment, Kaiser Wilhelm 2
Legenda: Bastiment, Kaiser Wilhelm II Wikipedia

Sco var 300'000 auters Svizzers è era el passà il post d'immigraziun Ellis Island: ses num chattan ins sin lingia 20.

Immigration List, Ellis Island
Legenda: Immigration List, Ellis Island ancestry

En California ha el lavurà sco mulschader, camarier, badigliader da charvun, schuldà, urbarisader, nettegiader da fanestras ed a la fin sco pasterner. El ha maridà, cumprà ina chasa ed ha gì ina figlia. Georg Dolf n'ha betg gì ina vita stravaganta, dentant è el in bun exempel per la gronda massa dals emigrants grischuns.

l'emigraziun en Val Schons

Co che quella vita persunala stat en connex cun l'entir fenomen da l’emigraziun da la Val Schons ans metta a lieu Peter Michael-Caflisch. El che ha elavurà l’emigraziun da la Val Schons en il cudesch «Hier hört man keine Glocken».

La Marella «Georg Dolf – il parent pers» è ina reflexiun da l’emigraziun avant passa 100 onns, lung la vita da Georg Dolf. Raquintada da Casper Nicca, il biadi dal frar da Georg Dolf. Sur brevs, documents e raquints s'avischina el a la vita dad in ch'è ì per restar.

Il film da Christoph Schaub davart l'emigraziun en Val Schons:

RR Marella 09:00 (repetiziun dal settember 2019)

Artitgels legids il pli savens