Siglir tar il cuntegn

Grischun Central Manevras betg lubidas tar brischament en tunnel

Tar il brischament d’in bus ch’igl ha dà avant in’emna en il tunnel dal San Bernardino han plirs automobilists vulvì l’auto ed èn returnads en direcziun portal dal sid. Quai ha confermà la Polizia chantunala. Atgnamain avessan els stuì bandunar il tunnel tras la sortida ed il tunnel d’urgenza.

Intgins automoblists n'han betg bandunà il tunnel entras la sortida d'urgenza.
Legenda: Intgins automoblists n'han betg bandunà il tunnel entras la sortida d'urgenza. RTR, Federico Belotti

Sco quai ch’il pledader da la Polizia chantunala Roman Rüegg ha confermà envers RTR, sappian els ch’autos hajan vieut en il tunnel ed hajan bandunà uschia il tunnel. Quai saja in grond privel, per l’ina cun ina manevra betg lubida sur la lingia da segirezza, e per l’autra possia il fim sa derasar fitg spert en in tunnel.

Tar il brischament dal bus en il tunnel è ina gronda part dal fim dentant vegnida tschitschada davent sur in ventilatur. Era sche divers automobilists han reagì sbaglià: Cun consequenzas na ston els betg quintar, cun quai che las registraziuns da video n’èn tenor il dretg betg bunas avunda, ha ditg il pledader da la polizia.

RR actualitad 07:00