Siglir tar il cuntegn
cuntegn

Grischun Central Leo Thomann vul s’engaschar per il turissem da Surses

Leo Thomann è il sulet candidat per il presidi da la nova vischnanca Surses che va en vigur l’emprim da schaner 2016. Thomann spera, che las collavuraziuns daventian meglras e ch’i vegnia finalmain realisà projects en il Surses.

Leo Thomann n'ha nagina concurrenza per il post sco mastral.
Legenda: Leo Thomann n'ha nagina concurrenza per il post sco mastral. Leo Thomann n'ha nagina concurrenza per il post sco mastral. Flyer PLD
La tensiun crescha, ils 20 da settember vegn elegì.
Legenda: La tensiun crescha, ils 20 da settember vegn elegì. RTR, F. Belotti

Leo Thomann ha 59 onns, è commember da la Partida liberaldemocratica svizra (PLD) e viva a Parsonz. El ha trais uffants creschids ensemen cun sia dunna Gaby Thomann, ch’è dapi l’onn passà deputada da la PLD en il Cussegl grond a Cuira.

Gia passa 30 onns lavura Leo Thomann sco selvicultur da revier. Ussa para il temp d’esser madir per el da cumenzar ina nova carriera: «La politica ha adina interessà ferm a mai, per mai èsi ina gronda sfida da metter ensemen las nov vischnancas ch’han fusiunà e da guardar che quest travagl funcziuna».

Las collavuraziuns èn flaivlas

Il grond problem en la val vesa el tar las collavuraziuns. Fin ussa haja la collavuraziun betg funcziunà fitg bain tranter las nov vischnancas, e quai surtut en il sectur dal turissem. Suenter la fusiun spera el, ch’i vegnia en il futur pli simpel da realisar projects, uschia Leo Thomann.

Savognin ha fatg buna lavur.
Autur: Leo Thomanncandidat per il presidi communal

Quai che pertutga l’hotellaria vul il candidat per il presidi cuntinuar cun l’engaschi, ch’è per exempel vegnì da la vischnanca da Savognin: «La lavur che Savognin ha fatg enfin ussa giuditgesch jau sco fitg buna, qua vuless jau cuntinuar - fin ussa hai dà blers projects en la val, ma pauc è vegnì realisà. Ussa è vegnì il temp da realisaziun». Cun porscher terren favuraivel vul la vischnanca da Savognin promover projects da novs hotels.

Toleranza vicendaivla è dumandada

Quai che pertutga la lingua uffiziala en la vischnanca nova, qua spera il nov president communal sin la toleranza vicendaivla da las persunas da lingua tudestga sco era quels da lingua rumantscha: «Cun ils meds tecnics che nus avain oz èsi pussaivel da manar la vischnanca uschia che tuts chapeschan per tge ch’i va», uschia Leo Thomann che spera da survegnir paucs cedels vids ils 20 da settember, il di d’elecziun.

L’elecziun è quasi segira cunquai ch’il candidat na sto betg cuntanscher in tschert dumber da vuschs ed autras persunas na pon betg vegnir elegidas sco president communal. Per ils 4 posts en suprastanza datti 8 candidats.