Sin in plazzal a Lantsch è in lavurer sa blessà fermamain vi d'in maun en venderdi avantmezdi. El vuleva enturn las 09:45 resgiar in lain. Cun il maun sanester saja il lavurer da 36 onns lura vegnì en il plat d'ina resgia radunda. Quai scriva la Polizia chantunala.
La Rega ha transportà l'um en l'ospital chantunal a Cuira. E tenor la polizia n'èsi betg exclus che l'um perda plirs da ses dets. La polizia vegn a sclerir l'andament da l'accident.
RR novitads 17:00