La radunanza communala da Lantsch ha approvà cun 37 tar 5 vuschs in credit da planisaziun da 285'000 francs per sviluppar vinavant a moda persistenta l’areal economic Bual. L’Arena da biatlon che sa chatta là saja in impurtant motor economic per la vischnanca, e quel valia da sviluppar vinavant, hai gì num a la radunanza communala. En il focus da la planisaziun stettian mesiras vi da l’infrastructura ed in plan da fatschenta che reglescha la finanziaziun. L’ovra existenta duai vegnir cumplettada, las lavurs duain esser terminadas enfin il 2025 cura ch'il campiunadi mundial da biatlon ha lieu. Tge ch’i vegn fatg concret n’è il mument betg anc decidì.
Or da stalla duai dar abitaziuns per seniors
Plinavant ha il suveran da Lantsch decidì da cumprar per 100’000 francs la stalla da Baptist Simeon. Questa parcella 408 cun 208 meters quadrats pudess en l’avegnir vegnir duvrada per construir spazi d’abitadi per indigens per in pretsch favuraivel.
Via custa dapli
Per sanar la Voia da Nos è vegnì approvà in credit supplementar da 60’000 francs, ils custs totals per la sanaziun muntan a 320’000 francs.
Lescha da turissem vegn adattada
En la lescha da turissem ch’è gia vegnida approvada il schaner 2021 han las votantas ed ils votants approvà midadas en l’artitgel tschintg. Tranter auter na pajan uffants enfin 16 onns nagina taxa da giasts pli. Questa adattaziun è vegnida fatga per avair las medemas reglas sco en vischnanca da Vaz, ch’ha approvà la lescha il zercladur da quest onn.
Definì pretschs d'electricitad
Plinavant ha Lantsch approvà las novas tariffas d'electricitad per l’auter onn. La tariffas d’energia restan sco enfin qua, tar las tariffas d'utilisaziun da la rait datti in augment da 1,50 raps per ura kilowatt. In pitschen augment da 0,10 raps sin 0,90 raps datti era per las prestaziuns d’utilitad publica sco daners per la cussegliaziun d’energia e contribuziuns da promoziun.
