Siglir tar il cuntegn
Inhalt

Grischun Central Landi resta a Tusaun

Tenor il mainafatschenta da la Landi Grischun Joachim Kirchler vegn il negozi a Tusaun puspè reconstruì.

Il negozi da la Landi a Tusaun è mo pli ina ruina.
Legenda: Il negozi da la Landi a Tusaun è mo pli ina ruina. Landi Graubünden AG

En ina communicaziun a las medias ha il mainafatschenta da la Landi Grischun Joachim Kirchler confirmà a RTR ch'il negozi a Tusaun ch'è brischà ier cumplettamain vegnia puspè reconstruì. Quant gronds ch'ils donns èn n'ha el dentant anc betg savì communitgar. Era il motiv dal brischament saja anc betg sclerì, la polizia chantunala haja cumenzà cun las investigaziuns.

Negozi provisoric

Enfin ch'il nov negozi da la Landi a Tusaun saja bajegià, duai vegnir endrizzà in negozi provisoric. Quai per pudair furnir vinavant rauba cunzunt als purs da la regiun, ha la Landi infurmà. Nua che quella stizun provisorica vegnia averta e cunzunt davent da cura che quai vegnia ad esser il cas, saja dentant anc betg definì.

Per las circa 20 persunas che avevan plazza en la Landi a Tusaun vegnia tschertgà schliaziuns individualas. Per exempel vegnia sclerì, sch'i saja pussibel dad ir a lavurar en ils negozis da la Landi a Landquart u a Glion.

RR novitads 12:00