Siglir tar il cuntegn

Grischun Central Lai Marketing e Support SA stritga trais plazzas

L’organisaziun da marketing da la destinaziun da Lai s’orientescha da nov, e stritga trais plazzas. La raschun è la perdita d’in mandat da las Pendicularas da Lai.

La pendiculara da l'Urden che colliescha Lai cun Arosa.
Legenda: La pendiculara da l'Urden che colliescha Lai cun Arosa. RTR, Federico Belotti

A partir da l’emprim da matg perda la «Lai Marketing e Support SA» il mandat da la vendita e management da products da las pendicularas da Lai. Quellas collavureschan da nov cun las pendicularas d’Arosa. Sco consequenza stritga la Lai Marketing e Support SA trais da total 32 plazzas. Duas da quellas surpiglian las pendicularas da Lai, uschia ch’i va a perder ina plazza en la destinaziun da Lai.

Quai conferma Bruno Fläcklin, il manader da fatschenta da la Lai Marketing e support SA. Las pendicularas da Lai ed Arosa speran, d’augmentar las frequenzas durant la stad sco era l’enviern. La stad passada han las Pendicularas da Lai incumbensà Ariane Ehrat, l’anteriura directura da la destinaziun Engiadina San Murezzan. Ella è responsabla per las midadas da marketing en la vendita e distribuziun.

RR novitads 17:00