Siglir tar il cuntegn

Grischun Central Lai da Solas da nov senza aua restanta

L'Ovra electrica da Turitg EWZ na renoveschan betg il label d'electric ecologic «Naturemade star». Da nov producescha l'ovra da Solas mo pli sut il label «Naturemade basic» ch'ha pretensiuns pli bassas.

Archiv: Il lai da Solas durant la modernisaziun l'onn 2012.
Legenda: Archiv: Il lai da Solas durant la modernisaziun l'onn 2012. RTR, Federico Belotti

Entras quella midada na sto il lai da fermada da Solas en l'avegnir betg pli a laschar cular aua restanta or dal lai. Da nov po la EWZ uschia producir 29 empè da mo 22 uras gigawatt ad onn. Sco quai che la EWZ scriva en ina communicaziun, na saja il passagi dals peschs tar l'ovra da Solas cundiziunà da la natira betg pussaivel senza interrupziun, cun quai ch'i haja radund 600 meters sur e sut la tschiffada d’aua impediments natirals, ch'eviteschan l'ascensiun dals peschs. Cun quai haja l'aua restanta mo in pitschen niz, scriva la EWZ plinavant. La stgala da peschs vegnia betg disfatga, mabain emplenida cun terra ed i vegn semnà in prà.

Cun quai vegn il diever da l’aua dal Heidbach e tar la chavorgia dal Schin enfin Seglias puspè a correspunder al stan dal 2008. Pervia da l’aua restanta haja l'ovra da Solas il davos temp pliras giadas gì problems, scriva la EWZ. L'aua en las lingias da pressiun schelava, perquai ch'il lai stueva dar giu memia bler'aua restanta al Heidbach.

Pauc plaschair tar las organisaziuns da l'ambient

Las organisaziuns da l’ambient èn vegnidas infurmadas davart la midada. Envers RTR ha Anita Mazzetta la manadra dal WWF Grischun ditg: «Natiralmain n’havain nus betg plaschair da questa decisiun, perquai ch’il fatg che l’aual aveva aua restanta era d’avantatg, nus stuain dentant acceptar la decisiun da la EWZ, cun quai ch’in tal label fan els da libra voluntad, qua na datti naginas leschas che nus pudain far insatge encunter».

EWZ avunda electric schuber

L’Ovra electrica da Turitg argumentescha, ch’ella haja il mument avunda electric schuber cun label dal standard pli aut. En la Bregaglia haja l’ovra idraulica da Castasegna l’onn 2015 survegnì il label Naturemade Star, là ins haja augmentà marcantamain l’aua restanta. Ed en il Surses ins saja il mument vid sanar realisar mesiras per auas restantas. Uschia vegnia il lai da fermada da Marmorera per l’emprima giada a dar giu aua restanta suenter la realisaziun d’in indriz da dotaziun l’onn 2019.

RR novitads 21:00