Siglir tar il cuntegn
cuntegn

Grischun Central La Viafier retica sanescha il tunnel Mistail

Il tunnel da Mistail tranter Casti e Solas vegn sanà. Perquai vegn serrà il traject da tren Tusaun-Casti tranter ils 30 d’october ed ils 17 da november. I dat in servetsch da bus ed igl è da quintar cun retards d’enfin 15 minutas, uschia infurmescha la Viafier retica.

Il tunnel da Mistail vegn renovà tenor la medema metoda sco il Tunnel da Glatscheras (foto) a Bravuogn.
Legenda: Il tunnel da Mistail vegn renovà tenor la medema metoda sco il Tunnel da Glatscheras (foto) a Bravuogn. Viafier retica

Il tunnel da Mistail è 110 onns vegl. Sia sanaziun vegn fatga en plirs pass.

Traject da tren Casti-Tusaun resta serrà temporarmain

Durant il temp da sanaziun da quest atun vegnan midads ils binaris, il portal da la vart da Casti vegn sbuvà e la sola dals binaris vegn sbassada. En pli vegn montà in binari provisoric per il temp da renovaziun.

Il traject resta lura serrà. La Viafier retica ha endrizzà in servetsch da bus, avertescha dentant da calcular cun enfin 15 minutas retard. Per viadis da ed en l'Engiadina recumonda ella a ses public da prender il tren via Vereina.

Proximas etappas da la renovaziun

Ils onns 2018 e 2019 vegn il tunnel lura sanà tenor il nov sistem da renovar tunnels. Plinavant survegnan ils portals ina construcziun da betun e crap. La fin dal 2019 vegn endrizzada l’entira tecnica ed i dat ina signalisaziun da la sortida d’urgenza cun passamauns illuminads.

Ils custs per sanar il tunnel da Mistail muntan a circa 15,5 milliuns francs.