Siglir tar il cuntegn

Header

cuntegn

Grischun Central «La vendita directa n’è betg ina spassegiada da la dumengia»

Adina dapli persunas cumpran la charn directamain d’in bain puril e betg en ina stizun. Medemamain vendan adina dapli purs lur products direct a clients, conferman differentas uniuns purilas. In pur che venda dapi 25 onns charn ed auters products directamain è Willy Dolf da Maton.

L’onn 1990 aveva la stalla da Willy e Martina Dolf basegn d’ina renovaziun. A questa chaschun han il pur e sia dunna bajegià ina nova stalla è midà lur bain puril en in manaschi da vatgas-mamma. In onn pli tard han els lura fatg la midada sin bio.

Dapi lura vendan Willy e Martina Dolf ina gronda part da lur products sin via directa als clients – saja quai entras furnir charn u vender products en ina chasina davant lur chasa.

audio
Bunura: Cumpra directa tar purs è el trend – er a Maton
ord Actualitad dals 26.10.2016.
laschar ir. Durada: 2 minutas 41 Secundas.

Martgà è dir

Era Willy Dolf percorscha ch’i dat adina dapli purs che porschan la vendita directa. Uschia è il martgà daventà pli dir.

Ils divers scandals da charn e malsognas han segiramain contribuì lur part latiers. Dentant: Quai saja il trumf ch’el emprovia da nizzegiar, uschia Willy Dolf. Oz ha el numnadamain ina clientella stabla da radund 90 cumpraders.

Creativitad per mantegnair ed acquirir novs clients

Per mantegnair ils clients existents na s’annunzia Willy Dolf betg mo tar els cura ch’el vul vender insatge. L’onn passà ha el per exempel organisà ina festa cun guida sin ses bain puril.

Per gudagnar nova clientella è il pur passiunà en emprima lingia avisà ch’ils clients existents fetschian reclama – da bucca a bucca. Plinavant porscha el pitschnas turas cun asens a Maton. Uschia dettia quai adina puspè la pussaivladad da far attent la glieud sin lur products.

RR actualitad 08:00

Artitgels legids il pli savens