Siglir tar il cuntegn

Grischun Central La tur cotschna sin il Pass dal Güglia

Il festival cultural Origen bajegia ina tur da lain sin il Pass dal Güglia sin 2’300 meters sur mar. Il matg è l’emprima badigliada, ha Origen communitgà il glindesdi. Premeria ha l’opera «Apocalypse» da Gion Antoni Derungs.

Legende: Video Origen construescha en aut: La tur cotschna sin il Güglia abspielen. Laufzeit 02:41 Minuten.
Or da Telesguard dals 18.04.2017.

Sco quai che l’intendant da Origen Giovanni Netzer ha ditg, vegnia il cusseglier federal Alain Berset ad inaugurar il teater sin il Güglia ils 31 da fanadur. Il teater vegn duvrà ils proxims quatter onns, suenter vegn l'implant puspè demnontà.

La tur sin il Güglia custa radund 2,5 milliuns francs. Ils custs surpiglian tant il maun public sco era fundaziuns culturalas e sponsurs. Anc mancan radund 800'000 francs, per finir l'entira construcziun sco per exempel il tetg. Giovanni Netzer è dentant da buna speranza, da pudair finanziar era la segund'etappa dal project sco quai ch'el ha trandì ad RTR.

Sin la tur sin il Pass dal Güglia vegn concertà durant l'entir onn. Ina gronda sfida saja l'aura, che pudess mintgatant far in stritg tras il quint dal teater. Per vegnir tar il teater dal pass, datti transports specials cun l'auto da posta.

La tur è ina construcziun da laina cun in'autezza da 30 meters. Cun sias fanestras rodundas ragorda la tur a la tur da Babylon. Entamez da la construcziun sa chatta la tribuna, che po vegnir auzada automaticamain sin differentas auzadas. Dapli che 200 persunas pon visitar il teater il medem mument, els sesan en loggias a l'ur da la tribuna.