Dapi la primavaira è la Fundaziun Medias Rumantschas a la tschertga da dus redacturs per il Grischun Central. Blers inserats e telefons da piz a chantun, haja el fatg, di il schefredactur da la FMR, David Truttmann. D'occupar èn las duas plazzas per ils redacturs actuals che van en pensiun.
L'Uniun rumantscha da Surmeir URS ch'è l'editura da la gasetta emnila ha fatg ina cunvegna cun la Fundaziun Medias Rumantschas FMR per pudair garantir la part redacziunala durant ils proxims tschintg onns. Ina responsabladad che il schefredactur David Truttmann vul en tutta cas resguardar. Dentant i dovria era il persunal per pudair far quai.
Proximamain s'inscuntra la FMR cun la URS per discutar scenaris per l'avegnir da La Pagina da Surmeir. Ina opziun saja era collavurar dapli cun collavuraturs libers ed integrar artichels redacziunals generals en la gasetta, suenter avair transcrit quels en surmiran.
