Siglir tar il cuntegn

Grischun Central La Ela Card n’è betg pli gratuita

La carta turistica da Savognin Turissem che cumpiglia differents rabats, n’è betg pli gratuita. La raschun principala è in’augment da las taxas da l’Auto da Posta.

Ela Card.
Legenda: Da nov datti la Ela Card mo pli en ina versiun digitala per telefonins u stampà sin in fegl A4. RTR, Federico Belotti

La Ela Card porscha differents rabats sco entradas en museums u bogns, schizunt viadis cun la pendiculara da Savognin èn inclus. Enfin ussa è la Ela Card stada gratuita per tuts. Da nov ston indigens pajar 20 francs ad onn per la carta, e possessurs da segundas abitaziuns 40 francs. Sco quai che Tanja Amacher, la directura da Savognin Turissem ha ditg, sajan ils custs dals differents purtaders da prestaziuns s’augmentads sin dapli che 600’000 francs ad onn.

Auto da Posta custa dapli

Zunt grond saja l’augment tar l’Auto da Posta Svizzer. Il contract da diesch onns, ch’è scadì l’avrigl da quest onn, ha stuì vegnir renovà. Da nov sto Savognin Turissem pajar dubel uschè bler sco enfin qua per la purschida da l’Auto da Posta, quel è inclus en la Ela Card per ils turists ed ils possessurs da segundas abitaziuns. Stritgar questa purschida na saja dentant stà nagina opziun, ha ditg Tanja Amacher che vul promover il traffic public.

Savognin Turissem quinta da vender en l’emprim onn 5’000 Ela Cards, tge che duai garantir era en l’avegnir la Ela Card. Per ils giasts da vacanzas sa mida nagut, cun la taxa da cura è era inclusa la Ela Card.

RR actualitad 08:00