Siglir tar il cuntegn
Inhalt

Grischun Central La craisma dat da discutar en il Surses

La primavaira da l’auter onn è er en il Surses puspè la craisma. Il vicari da Savognin e Surses ha scrit en ina brev als geniturs che mo persunas catolicas pon daventar padrin u madritscha. Quai ed era auter ha dà da discutar en la val.

Vista sin las baselgias da Nossadonna e Son Martegn a Savognin.
Legenda: Vista sin las baselgias da Nossadonna e Son Martegn a Savognin. RTR, Federico Belotti

Il dretg canonic da la Baselgia catolica definescha, tgi che po daventar padrin u madritscha. En vista a la craisma da l’auter onn en Surses, ha il vicari Philipp Isenegger fatg attent ils geniturs sin l’artitgel 874 dal dretg canonic. Quel prevesa ch’in padrin u ina madritscha deriva da la religiun catolica.

Excepziuns pussaivlas

Sin dumonda dal Radio Rumantsch ha il vicari confermà, ch’el acceptia excepziunalmain era padrins e madritschas da la religiun refurmada. Quellas persunas n'hajan dentant betg il dretg da s’inscriver en il cudesch da craisma, quai saja previs mo per catolics, uschia Isenegger.

Preparaziun è impurtanta

Da discutar ha era dà il fatg, ch'ils uffants che spetgan la craisma ston visitar in curs dad otg dis e far in viadi cultural obligatoric a Roma. Sco quai ch'il vicari ha ditg ad RTR saja quai fitg impurtant ch'ils uffants visitan tut ils curs da preparaziun. Els stoppian oramai sa decider sch'els veglian sa preparar bain sin la craisma, u sch'i saja pli impurtant per exempel da betg manchentar curs da sport.

RR actualitad 07:00