Siglir tar il cuntegn
Inhalt

Grischun Central In e scadin po influenzar l’urari

Mintga dus onns pon vischnancas, firmas e privats inoltrar a la regiun propostas per l’urari dal traffic public. Per l’urari 2018/2019 scada il termin ils 28 da favrer.

L'urari dal traffic public po vegnir influenzà entras giavischs.
Legenda: L'urari dal traffic public po vegnir influenzà entras giavischs. RTR / Federico Belotti

RTR ha dumandà la presidenta da la regiun d’urari 5 (Mantogna, Valragn e Tumleastga) Kathrin Schläpfer, quantas dumondas ch’èn vegnidas inoltradas. Fin ussa haja ella survegnì radund 20 dumondas per adattar l’urari, tge che saja cuntentaivel.

Kathrin Schläpfer examinescha il mument ils giavischs da la regiun Viamala.
Legenda: Kathrin Schläpfer examinescha il mument ils giavischs da la regiun Viamala. RTR / Federico Belotti

Ensemen cun l’uffizi d’energia e da traffic ed ils responsabels da las interpresas da transport vegnan ils giavischs examinads. Tar mintga dumonda datti ina resposta, sch’il giavisch po vegnir realisà, u sche betg cun ils arguments pertge betg.

Co funcziuna quai?

La lescha davart il traffic public en il Grischun definescha las cundiziuns da basa, e tgi che sto pajar las prestaziuns.
– Il Cussegl grond decida davart il preventiv per rinforzar il traffic public.
– En general han propostas che gidan ad ina gronda part da la populaziun pli grondas schanzas da vegnir realisadas, che giavischs che resguardan mo interess singuls.
– Tar prestaziuns che na vegnan betg finanziadas dal chantun pon las vischnancas decider, sch’ellas vulan finanziar sezzas ina purschida. Quai po per exempel esser in bus sin dumonda, finanzià da la vischnanca.