Siglir tar il cuntegn

Grischun Central Implants da sport Bravuogn: Enviern 2016/17 è segirà

La stagiun d’enviern dals Implants da Sport Bravuogn SA è segirada. Cun donaziuns ha l’interpresa rimnà 300‘000 francs. Quai èn 50‘000 francs dapli che quai che fiss stà necessari.

Sutgera da Bravuogn.
Legenda: La proxima stagiun d'enviern vegnan las sutgeras vers La Diala e l'Alp Darlux a cursar. RTR, F. Caduff

Per la proxima stagiun d’enviern saja il manaschi cunquai segirà, ha ditg Christoph Jäckle il president dal cussegl d’administraziun envers la televisiun SRF. La finanziaziun suenter la stagiun d’enviern 2016/17 è dentant anc intscherta. Per segirar il manaschi dovra l’interpresa che maina duas sutgeras ed in runal mintg’onn anc in retgav da gestiun da 100’000 francs. Finanziar quai duai la regiun.

Import n'è betg anc segirà

«Purtaders che lavuran a Bravuogn, sco la scola da skis, locaturs da scarsolas ed era tschertas sorts da hotels da famiglias che profitan direct da nossa purschida, stuain nus pudair integrar sco agid da partenza, per avrir la stagiun», uschia Christoph Jäckle envers l’emissiun «Schweiz Aktuell». Perquai che betg tut ils purtaders han anc ditg gea a la dumonda è l’avegnir dals implants da sport da Bravuogn anc adina intschert.

RR novitads 11:00