Siglir tar il cuntegn

Grischun Central «Il turissem dal Grischun Central duess collavurar pli stretg»

Dapi l’entschatta da favrer lavura Daniel Kunfermann Maissen per la Regiun Alvra sco nov sviluppader regiunal e per l’uniun Parc Ela. Suenter quels emprims trais mais datti gia in pitschen success per l’um da 39 onns da Domat ch’è creschì si a Tusaun.

Daniel Kunfermann Maissen, il nov sviluppader regiunal e collavuratur dal Parc Ela.
Legenda: Daniel Kunfermann Maissen, il nov sviluppader regiunal e collavuratur dal Parc Ela. RTR, Federico Belotti

Sco quai che Daniel Kunfermann Maissen ha ditg envers RTR, haja el ils davos trais mais gì blers inscunters, per emprender ad enconuscher ils purtaders da differentas organisaziuns, ils politichers ed ils indigens. Sco success valitescha el, ch’el haja organisà ina maisa radunda cun tut ils purtaders dal turissem dal Surses e da la Val d’Alvra, ch’èn organisads en trais organisaziuns turisticas.

Ina finamira da Daniel Kunfermann è, ch’il turissem collavura pli stretg en l’avegnir. Uschia duain il fanadur vegnir elavuradas duas fin trais propostas per la conferenza dals presidents. Quella duess lura tractar questas propostas il mais d’october. Ina mesira pussaivla saja l'elavuraziun d'ina carta da giasts cuminaivla.

RR actualitad 08:00