Loredana Todisco, la nova manadra da la redacziun dal «Pöschtli» ha fatg a Tusaun l’emprendissadi sco assistenta da farmazia. Pir suenter la matura professiunala è ella vegnida tar il schurnalissem. Suenter in praticum d’in onn tar la gasetta «Bündner Woche», ha ella studegià Multimedia Production tar la HTW a Cuira, ed ha er adina puspè scrit artitgels per las gasettas «Ruinaulta» e «Novitads».
Cun 25 onns è ella actualmain la pli giuvna manadra d’ina redacziun dal concern Somedia. In vent frestg pli giuven pudess’ins senz’auter s’accorscher, ha ditg la giuvna schurnalista. Ella vul en l’avegnir scriver regularmain purtrets da persunas interessantas da la regiun. Per il «Pöschtli» lavuran actualmain radund 10 collavuraturas e collavuraturs libers. La gasetta cumpara ina giada l’emna e vegn stampada mintgamai cun in’ediziun da 8’795 exemplars.