Il guaud magic traglischa puspè

Gia per la quarta giada traglischa a Lai il guaud magic dals 16 enfin ils 28 da december. Dasper in program da musica vegn era organisà ina fiera da Nadal. En tut dat quai da vesair instellaziuns da 12 artistas ed artists da la Svizra e da l'exteriur.

Laschar ir video «Impressiuns dal guaud magic 2016 Lai»

Impressiuns dal guaud magic 2016 Lai

1:10 min, Actualitad video dals 16.12.2016

Per las installaziuns da glisch è responsabla la gruppa Projektil sco curatura. Ella è responsabla per la planisaziun e la tscherna dals artists externs. Da 40 annunzias èn vegnidas tschernidas 12 installaziuns da glisch.

Vista en in occular surdimensiunà.

Legenda da maletgs: Vista en in occular surdimensiunà. RTR, Federico Belotti

Organisaturs quintan cun anc dapli visitaders

L'onn passà han visità radund 30'000 persunas il guaud magic en il center da Lai. Sco quai che Claudia Züllig dal comité d'organisaziun ha ditg, saja la finamira che 40’000 persunas visitan quest onn il guaud magic cun la fiera da Nadal. Il project da quest onn vegn budgetà cun radund 800’000 francs. Ina da las novaziuns da quest onn è la jurta magica, nua ch’i dat occurrenzas sco in teater da chasperet, raquints da praulas ed ina show cun in magi.

Quests uschèls tutgan franc tar in dals higlights da l'exposiziun.

Legenda da maletgs: Quests uschèls tutgan franc tar in dals higlights da l'exposiziun. RTR, Federico Belotti

RR actualitad 07:00