Siglir tar il cuntegn
Inhalt

Grischun Central Hotel Piz Mitgel marscha meglier che spetgà

Pervi dal curs aut dal franc svizzer, ha il Hotel Piz Mitgel a Savongin pli paucs giasts da la zona da l’euro. L’enviern aveva il hotel anc serrà durant 2 emnas pervi dals paucs giasts – ussa la stad para però da marschar bain.

Hotel Piz Mitgel a Savognin.
Legenda: Il hotel Piz Mitgel è vegnì construì l'onn 1870 per ils passagiers che sa fermavan cun la charrotscha da posta. RTR, F. Belotti

«Tut en tut èn ils affars marschads meglier che quai che jau hai temì», ha ditg il hotelier dal Piz Mitgel Sepp Waldegg. Ils Svizzers sajan tuttina vegnids, las gruppas instradadas l’onn passà sajan era vegnidas, e fitg impurtant per il hotel saja stà, che las gruppas ollandaisas sajan malgrà il curs bass da l’euro tuttina vegnidas. «Quai è ina surpraisa», ha ditg Sepp Waldegg. Sco quai ch’il hotelier ha ditg plinavant, lavurian actualmain 12 persunas en l’hotel. Pli baud sajan quai stà 25 persunas. Cun pli pauc persunal possia ussa il persunal era far liber pli pauc, uschiglio na funcziunass quai betg cun uschè pauc persunal ha ditg Sepp Waldegg.

Requirents d’asil en il Piz Mitgel?

Cun 70 onns è Sepp Waldegg ussa stanchel da far enavant. Perquai ch’ina successiun n’è betg en vista – era betg in cumprader per il hotel che pajass 3 enfin 3 milliuns e mez per il hotel – cuntinuescha el però tuttina cun sia lavur sco hotelier. El ponderescha però era da far abitaziuns per dar a tschains en l’hotel, u era da metter a disposiziun il hotel per requirents d’asil: «Nus avain gia inoltrà la dumonda tar il chantun», ha ditg Sepp Waldegg. Cun ina resposta sperta na quinta el però betg, cun quai ch’el na saja probabel betg il sulet cun ina tala proposta, uschia il hotelier da Savognin.